காதலின் மொழி

கனவுதேசம்....

2009-06-18T16:31:00.000-07:00

நிலவொளியில் நீயும், நானும்

சேர்ந்து நடக்கையில் - இது

கனவுதேசம் என்றலவோ

கருதத் தோன்றுது

பசுந்தறையில் அமர்ந்து நீயும்

பாட்டுப்பாடையில் - சுற்றி

மரத்தில் இருந்து

ரசிக்கிறது குயிலினங்களே

பனி விழும் பாதைதனில்

பயணம் செல்கையில் - நீ

இறுக்கிப் பிடித்த கைவழியே

என்னிதயம் உறையுதே

உரசிச்செல்லும் உந்தன்விழி

தீயை மூட்டுதே - அதிலென்

உணர்வுங் கொஞ்சம்

கள்ளமாக குளிர்காயுதே

புரியவில்லை இந்த சுகம்

புதுமையானதே - என்றும்

புரிந்து கொண்டு

வாழ்ந்துகொண்டால் சொர்க்கமானதே

முடியலையே....!

2009-05-29T16:53:00.000-07:00

தனித்திருந்த வாழ்க்கையது
கசத்திருந்த நாளொன்றில்
கண்ணெதிரே கண்டேன்
அந்தக் கள்ளியை - என்
நெஞ்சத்தைத் கொள்ளைகொண்ட
அன்புச் செல்வியை

தனியாகச் சிரித்ததில்லை
தலையணை மறந்ததில்லை
என்னவோ ஆச்சு எனக்கு
எங்கேயோ போச்சு மனது - ஆகா
நண்பர்கள் பட்ட துன்பம்
நான்படலானேனே இப்போது

உடுப்பது எடுக்கச் சென்றால்
உணவது அருந்தச் சென்றால்
தனியாகச் சிரித்துக்கொண்டேன்
கேட்டால் வெடுக்கென்று
முறைத்துக் கொண்டேன் -ஐயோ
இப்படி மாறிப்போனேனே

வாழ்க்கையின் வசந்தமிது
வந்தது எனக்குமிப்போ
கவிதைகளால் எல்லாம்
சொல்லத் தெரியலையே! - என்
கனவெல்லாம்
கீறிக் காட்டிட முடியலையே!

மூன்று கவிதைகள் - நன்றி youthful vikatan

2009-03-25T13:44:00.000-07:00

சுதந்திரம்..

வாசிக்க இங்கே சுட்டுங்கள்

http://youthful.vikatan.com/youth/thangarasapoem110309.asp

பொய்கள்..

வாசிக்க இங்கே சுட்டுங்கள்

http://youthful.vikatan.com/youth/thankarajapoem24032009.asp

மனம் துடிக்கும்.

வாசிக்க இங்கே சுட்டுங்கள்

http://youthful.vikatan.com/youth/thankarasapoem040309.asp

மனம் துடிக்கும்

2009-03-12T20:53:00.000-07:00

நிலவு பிடிக்கும்
நிலவெறிக்கும் நாளில் வரும் –உன்
நினைவு பிடிக்கும்
நினைவுகளில் வந்தொலிக்கும்
கொலுசு பிடிக்கும்

கொலுசுகளைக் கூட்டிவரும்
பாதங்கள் நடந்துபோன
பாதைபிடிக்கும்- நீ
கடந்துபோன பின்னும் என்
சிந்தைவிட்டகலா உன்
சிரித்த முகம் பிடிக்கும்

காற்றுக் கலைத்துவிளையாடும்
காதோரக் கூந்தல் பிடிக்கும்
கதைகள் சொல்லி இடையில்
‘கடி’க்கையில் சிவக்கும்
கன்னம் பிடிக்கும்

கவிதைசொன்ன வேளைகளில்-நீ
கண்ணிமைக்காதிருந்த
கணங்கள் பிடிக்கும்
திடீரெனக் கண்டதில்
சிந்தை தடுமாறிப்பின் நீ
சிரிக்க முன்சிரித்த
வளையல் பிடிக்கும்

கைகள் பேசிய
மொழி பிடிக்கும்
கண்கள் சொல்லிய
கவி பிடிக்கும்
தென்றல் திருடிவரும் உன்
மணம் பிடிக்கும்
திருமணம் முடித்திடுவென்று என்
மனம் துடிக்கும்.

http://youthful.vikatan.com/youth/thankarasapoem040309.asp

சிரிக்கக் கற்றுக்கொடுத்தவள் ....

2009-01-06T06:40:00.000-08:00

நீ
புன்னகைக்கும் போதெல்லாம் –என்னுள்
புதுரெத்தம் பாய்கிறது
உண்மையைச் சொல்
செவ்விதழ்களை நீ திறந்துகொள்வது
சிரிப்பதற்கா? அல்லதெனைச்
சிலிர்ப்பூட்டுவதற்கா?

தினமும் எழுந்து
சிந்திக்கிறேன் பெண்ணே –உன்
சிரிப்புக்குவமைகளை
கடைசியில் என்னையே நான்
நிந்தித்துக்கொள்கிறேன்
வராத வார்த்தைகளுக்காய்

நிட்சயமாய்ச் சொல்வேன்
நீதானெனக்குச்
சிரிக்கக் கற்றுக்கொடுத்தவள் –என்
வாழ்வின் மனஇறுக்கங்களால்
தோன்றிய வேதனைகளுக்கு நீ
மரண தேவதை

அதுவோர் காலங் கண்ணே
எல்லோருக்கும் விடிந்திருக்கும் நான்மட்டும்
இருட்டில் நடந்து கொண்டிருப்பேன் உன்
புன்னகைப் பொற்கரங்கள்
என்னிமைகளைத் தட்டித்திறக்காதவரை

நினைத்துப் பார்க்கிறேன்-நாம்
பேசிக்கொண்டதைவிட
பிரியமாகச் சிரித்துக்கொண்ட
பொழுதுகள் ஏராளம் ஒருவேளை
முறைத்துக் கொண்டால்கூட
அதுயார் முதலில்
சிரித்துக்கொள்வதென்பதற்காகவே
இருந்திருக்கும்.

விலகிப் போனபின்னும்
நீ சிந்திய எல்லாச் சிரிப்புகளையும்
சேமித்து வைத்திருக்கிறேன் என்
சின்ன இதயத்தில்
என்றாவதொருநாள் நினைத்து
எனக்குள் நானே
சிரித்துக் கொள்வதற்காய்.

ad -

Get paid for your photos or images - Make Money Online

எழுதப்படாத கடிதம்

2008-12-21T06:39:00.000-08:00

எப்போதாவது தோன்றும்
இதயத்தைப் பிழிந்து
எடுத்த சாற்றில் -உனக்கு என்
உணர்வுகளை எழுதவேண்டும்
ஒருதரமாவது என்று

கடதாசி,
இடையில் நிக்காத எழுதுகோல்,
எவரும் குழப்பாத அதிகாலை நேரம்,
எழுதியதும் உள்ளுக்குள் அழுத்தி
ஒட்டிக்கொள்ள அஞ்சல்,
முத்திரை,
அனைத்துமே தயார்.

எல்லாம் இருந்தும்
எதுவுமே இயலவில்லை
நெஞ்சுக்குள் வலி
கண்களுக்குள் நீர்
கைகள் விறைத்துப்போய்- சுவரை
வெறித்துப்பார்த்தபடி கதிரையில் நான்.

பொய்கள்..

2008-12-16T06:46:00.000-08:00

நானாகத் துரத்தவில்லை –உன்னால்
தூக்கமிழப்பதாய்ச் சொல்லி
துயர்கொள்ளவில்லை

வாழ்வும்,சாவும் உன்
வாய்ச்சொல்லில்தானென்று உன்னைப்
பேச்சிழக்கச் செய்யவில்லை

பிறந்தநாள் வாழ்த்தெழுதி அதைப்
பிரித்துப் படிக்கச்சொல்லி-உன்னைநான்
நிர்ப்பந்திக்கவில்லை

நீ போகும் பாதைபார்த்து
நீண்ண்டநேரம் காவல்காத்து உன்
வீடுவரை தொடரவில்லை

நீ கிழித்தெறிந்த காகித்ததை
நெஞ்சின்மேல் ஒட்டிக்கொண்டு
நித்திரை செய்யவில்லை

நினைவுகளில்,கனவுகளில்
நீதானடியென்று
கவிதை சொன்னதில்லை

எழுதிமுடித்த பேனாக்கள்- உன்
எச்சில்பட்ட முடிந்துபோன
‘ஐஸ்’ கிறீம் குவளைகள்
உதறியதில் வீழ்ந்த
உன்னுடுப்புப் பொத்தான்களென்று
எதையும் நான் சேகரித்ததில்லை

நீ பார்க்க வேண்டுமென்று
யாருக்கும் பிச்சை போட்டதில்லை

நீ சிரிக்க வேண்டுமென்று
சில்லறை ஜோக் அடித்ததில்லை

நீயாக வந்து பேசியபோதும்
நானாக எதையும் சொன்னதில்லை

உனக்குப் பிடிக்குமென்பதற்காய்
உள்ளுக்குள் புழுங்கிக்கொண்டு
ஒத்துப்போனதாய்க் காட்டியதில்லை

இப்போது கூட இதையெழுதியது
உனக்காக இல்லை.

கடவுள் எழுதிய கவிதை

2008-12-13T12:24:00.000-08:00

கண்களைமூடிக் கைகளைக்
கூப்பியிருந்தான் அவன்
இதயம் மட்டும் திறந்திருந்தது
எதிரே நிற்கும் எழிலின் இமைகள்
திறக்கும் எப்போதென்று

தன்னைத் தியானிப்பவன் கொஞ்சம்
தவமும் செய்யட்டுமெயென்று
எல்லாம் தெரிந்தும்
இறுக்கி மூடியிருந்தாள்
இமைகளை அவள்

எதுவுமே தெரியாத
சிலையாக
இருவருக்கும் முன்னே நான்.

மீளும் நினைவுகள்

2008-12-11T16:19:00.000-08:00

எப்போதும் போலவே
சந்திப்புக்கள் சத்தத்தோடும்
பிரிவுகள் மௌனத்தோடும்
அரங்கேறிப்போனதன்றும்

யன்னலுக்கு வெளியே
யுத்தத்தின் கோரம்
பேரூந்துள் நம்மிடையே
உணர்வுகளில் ஈரம்

சொல்ல நினைத்தவைகள்
இதயத்தின் ஏதாவோர் மூலையில்
எழமுடியாத ஆழத்தில்
எப்படியோ சிக்கிக்கொள்ள
பொறுக்கியெடுத்த சில
வார்த்தைகளே போதுமாய் இருந்தது
அப்போதுநாம் பேசிக்கொள்ள

பேசுபொருட்களெல்லாம்
பெறப்பட்டவைகளாக
நம்மைப் பொறுத்தமட்டில்
பெறுமதியற்றவைகளாக இருக்க
பேசவேண்டிய வார்த்தைகள்
காற்றாகி கடைசியில் {பெரு} மூச்சாகி
பேச்சின் இடையிடையே வந்து பொனது.

இறுதிவரை நம்
இதயத்துண்ர்வுகள் பற்றி
எச்சரிக்கையாகவே இருந்தோம்
விடைபெறும் வரை
விதி நம் ‘நா’ விற்கு
விலங்கிட்டிருந்தது

இப்போது கிடைத்தாலும்
ஏறிப்பார்க்கிறேன்
அந்த வழிப் பேரூந்தில்
மணமுறிவு பெற்ற நம்மை
மூன்றுமணிநேரம் ஒருமித்து
உட்காரவைத்த கர்வத்தோடு
உருக்குலையாமல் இருக்கும் அதன்
இருக்கைகளை ஒருதரம்………….

காதலின் மொழி

2008-12-10T08:56:00.000-08:00

இருவருக்கும் இடையில்
கூப்பிடு தூரந்தான் இடைவெளி- இருந்தும்
எதுவுமே பேசவில்லை
இதுவரையில் நாம்

குரல்நாண்களின்
வேலை நிறுத்தத்தால்
வெப்பக்காற்று மட்டும்
வெளியேறிக் கொண்டிக்கிறது
பெருமூச்சாக

சுற்றி நின்றவர் பேசினர்
தூரத்தில் குயில் கூவியது
வாகனங்கள் இரைந்தன
வாலாட்டியபடி வந்த நாய்
சும்மா குரைத்துப்போனது
இன்னும் எத்தனையோ
இரைச்சல்களுக்கு மத்தியில்
எந்தவித ஒலியும்
எழுப்பத் திரணியற்றவர்களாய்
உறைந்திருக்கிறோம் நாம்

நினைத்துப் பார்க்கிறேன்
நிறையவே நாம் பேசியிருக்கிறோம்
வருந்தியதும் உண்டு
சொல்லிய சில வார்த்தைகளுக்கும்
சொல்லாமல் போனத்தற்குமாக

இப்போது நமக்கிடையே
நிசப்த்தம் நிறைந்திருக்கிறது
வார்த்தைகள் வலுவிழந்துபோக
இதயம் விழித்துக்கொள்கிறது
நிறையவே பகிர்ந்து கொள்ளகிறோம்
நீ நினைத்ததும்
நான் நினைத்ததும்
நாம் நினைத்ததாக

சந்தேகம் வருகிறது
அப்படியென்றால் –காதலில்
சத்தங்கள் வெறும்
சம்பிருதாயந்தானா என்று

பறிபோன இரவு.....

2008-12-09T11:27:00.000-08:00

என் இன்றைய இரவும்
என்னுடையதாகவே இருந்திருக்கும்

I love you சொல்லி நீ
அசடு வழிந்திருந்தால் –என்
தப்பித்தல்கள் தாண்டி
இடித்துவிட்டு நீ
போயிருந்தால்

என் இன்றைய இரவும்
என்னுடையதாகவே இருந்திருக்கும்

அப்பா,அம்மாவின்
அச்சுறுத்தலுக்கு மத்தியிலும்
வீடுவரை பின்தொடர்ந்து
வீதிமுடிந்ததும் வெறுப்பேறி
என்பெயரை உன்னோடு இணைத்து
ஊருக்குள் என்தலைகுனிய
ஓலமிட்டுச் சென்றிருந்தால்

என் இன்றைய இரவும்
என்னுடையதாகவே இருந்திருக்கும்

இதேதுமின்றி
எங்கிருந்தோ வந்து
கொச்சைப்படுத்தாமல்
கூசும்படி சொல்லுரைக்காது
கூட்டத்தின் நடுவே
நானறியா வேளைதனில்
நழுவியிருந்த என் ஆடைதனை
ஏற்றிவிடும்படி
இங்கிதமாய் சொல்லிச் சென்றாயே
அப்போது நான் அறியவில்லை

இன்றைய இரவு
என்னிடம் இருந்து
பறிபோகும் என்பதை.

இது இறுதி அழைப்பு

2008-11-12T19:38:00.000-08:00

உன்நினைவலைகள்
ஒன்றோடொன்று
உரசிக்கொண்டதில்
என் நெஞ்சுக்குள்
தீப்பிடித்துக்கொண்டது
எதற்காகவோ வந்த
இனக்கலவரத்தில்
எரிந்துபோன எங்கள் வீடுபோல்
இப்போதெல்லாம் என்
இதயவறைச் சுவர்கள்
கரியவறைகளாகவே
காட்ச்சியளிக்கின்றன

அன்பே உன் கண்களென்ன
அமெரிக்காவின் ஆயுதக்கப்பலா?
ஒரு நொடி நீ
உற்றுப்பார்த்த்தில்
ஓராயிரம் ஏவுகணைகள்
என் இதயத்தில்

கொஞ்சும் மொழியும்
குழிவிழும் கன்னத்தோடு வரும்
குறுநகையும் உன்
குங்கும இதழ்களில் இருந்து
இடம் பெயர்கையில் நான்
என்னையறியாமலேயே
அனைத்திலும் இருந்து அன்னியப்பட்டு
அகதியாய் போகிறேன்

உன் ஒவ்வொரு அசைவுகளுமெனை
உருக்குலைய வைக்கின்றன இந்தக்
கொடுமை தாங்காதுதானே
கோயிலுக்குள் தஞ்சமானேன் அங்கும் நீ
குண்டெறிவாய் என நான்
கொஞ்சமும் எதிர்பார்க்கவில்லை
இப்போதுபார் என்
இதயத்துக் கூரைபிளந்து
உள்ளுக்குள் குற்றுயிராய்
உன்னைப்பற்றிய நினைவுகள்

என்னுள்ளத்தைப்
பொறுத்தமட்டில்
வனிதையே – நீ
வந்தேறு குடிதான்
நான்
ஈழத்துத் தமிழர் போல்
இங்கேயே இருந்தவன்
என்னபயனின்று
நீ – ஆளும் அரசி
நான் அனாதரவான அடிமை
சுயநிர்ணய உரிமைகொடு
அல்லதென்னைச்
சும்மாவாவது இருக்கவிடு

இறுதியாய் கேட்கிறேன்
புறப்பட்டுவா - இருவருமோர்
புரிந்துணர்வு ஒப்பந்தம் செய்வோம்
இல்லறமெனும் இறமைக்குள்